KAU мен Almaty Hub ынтымақтастық туралы меморандумға қол қойды

25 мамыр күні Қазақ-Американ Университеті мен Астана Хаб-тың филиалы Almaty Hub арасында ынтымақтастық туралы меморандумға қол қойылды.

Құжат білім беру, цифрлық технологиялар, инновациялар және IT-индустрия үшін жоғары білікті кадрлар даярлау бағытындағы әріптестікті дамытуға бағытталған. Меморандумға KAU Президенті Асылбек Исахов және Almaty Hub филиалының директоры Аида Дусова қол қойды.

Кездесу барысында тараптар өзара іс-қимылдың перспективалық бағыттарын талқылады. Олардың қатарында IT-нарықтың қазіргі талаптарын ескере отырып білім беру бағдарламаларын жетілдіру, студенттік стартаптарды дамыту, білім алушылар үшін практика мен тағылымдамаларды ұйымдастыру, сондай-ақ бірлескен білім беру, ғылыми-практикалық және жобалық іс-шаралар өткізу мәселелері бар.

Ынтымақтастық аясында IT-индустрия өкілдерінің қатысуымен семинарлар, тренингтер, мастер-кластар, воркшоптар мен хакатондар өткізу көзделген. Сонымен қатар цифрлық технологиялар мен инновациялар саласындағы бірлескен жобаларды іске асыруға, зертханалар мен құзырет орталықтарын құруға, жастар бастамаларын қолдауға және студенттердің кәсіпкерлік дағдыларын дамытуға ерекше назар аударылады.

Меморандумға қол қою KAU-да практикаға бағытталған білім беруді кеңейту және университеттің Алматыдағы IT-экожүйемен байланысын нығайту жолындағы маңызды қадам болды.