Қазақстан құрамасы KAU президентінің жетекшілігімен БМО-да алтын медаль жеңіп алды
Қазақстанның ұлттық құрамасы Қазақ-Американ Университетінің президенті жетекшілігімен 2026 жылғы Балқан математикалық олимпиадасында алтын медаль жеңіп алды.
Грекияның Салоники қаласында өткен халықаралық зияткерлік сайысқа 148 оқушы қатысты. Олимпиадаға Балқан өңірі елдерінің командалары және Азия мен Еуропадан шақырылған құрамалар қатысты. Жарыс қорытындысы бойынша Қазақстан құрамасы бір алтын, екі күміс және үш қола медаль иеленіп, жалпы командалық есепте 6-орынға ие болды.
Қазақстан құрамасының қоржынына алтын медальді Haileybury Almaty мектебінің 12-сынып оқушысы Мұрат Тимур салды. Ол ең жоғары 40 балл жинап, осындай нәтижеге қол жеткізген үш қатысушының бірі болды. Күміс медаль иегерлері 10-сынып оқушысы Алиасқар Сұлтанәлі және 11-сынып оқушысы Орынбасар Бердібек атанды. Қола медальді 10-сынып оқушысы Бейганов Батырхан, сондай-ақ 11-сынып оқушылары Еркебұланұлы Али мен Ансатов Арнұр жеңіп алды.
Қазақстан құрамасының жетекшілері ретінде Қазақ-Американ Университетінің президенті Асылбек Исахов және Астана-Нұра зияткерлік мектебі филиалының маманы Мұхтар Қабақ болды.
KAU президенті 2020 жылдан бері қазақстандық оқушылардың халықаралық математикалық олимпиадаларға, соның ішінде IMO және BMO жарыстарына қатысуына жетекшілік етіп келеді. Осы кезеңде Қазақстанның жас математиктері халықаралық аренада ел намысын абыроймен қорғап, тұрақты түрде жоғары нәтижелер көрсетіп келеді.
Асылбек Исахов атап өткендей, мұндай жеңістер жастарымыздың зияткерлік әлеуетінің жоғары екенін көрсетеді. Талантты, мақсатшыл және еңбекқор оқушылар болашақта еліміздің ғылымын, білімін, технологиясын және экономикасын дамытуға үлес қосады. Өз кезегінде Қазақ-Американ Университеті дарынды жастарды қолдауға және олардың академиялық өсуіне жағдай жасауға әрдайым дайын.
Халықаралық білім беру корпорациясының құрылтайшысы Айғазы Құсайынов олимпиадаға қатысқан дарынды оқушыларды қолдау мақсатында KAU оқу гранттарын бөлді. Университетте олимпиадалық қозғалысты қолдау еліміздің болашақ зияткерлік элитасын даярлаудың маңызды бағыттарының бірі екенін атап өтті.
