DefenseGlobal оңтүстіккореялық компаниясының CEO-сы КАУ-де

Қазақ-Америка университетінің президенті Асылбек Исаховтың Оңтүстік Кореяның DefenseGlobal компаниясының бас атқарушы директоры Хонг Джин Сонмен кездесуі өтті. Кездесу барысында тараптар Қазақстан мен Оңтүстік Корея арасындағы білім беру жүйелерін жақындатуға бағытталған өзара іс-қимылдың түрлі аспектілерін талқылады.

Президент университет қызметі мен стратегиялық даму бағыттарын таныстырып, оның ішінде American Study Camp бағдарламасына ерекше тоқталды. Аталған бастама аясында ҚАУ студенттері жуырда АҚШ-қа барып, Массачусетс, Коннектикут және Нью-Йорк штаттарындағы жетекші университеттерді аралады. Бағдарлама географиясын кеңейтіп, Оңтүстік Кореяда білім алу мүмкіндіктерін қарастыру ниеті де атап өтілді.

Қонақ көрсетілген жылы қабылдау үшін алғыс білдіріп, ынтымақтастыққа ашық екенін жеткізді және өзара әрекеттестіктің бірқатар бағыттарын ұсынды.

Кездесу барысында қос диплом бағдарламаларын дамыту және академиялық ұтқырлық мәселелеріне, соның ішінде қысқа мерзімді білім беру сапарлары мен технологиялық сектордағы тағылымдамаларды ұйымдастыруға ерекше назар аударылды. Сонымен қатар, ақпараттық технологиялар мен компьютерлік ғылымдар саласында жаңа білім беру бағыттарын іске қосу жоспарлары қарастырылды.

Кездесу қорытындысы бойынша тараптар әріптестікті одан әрі дамытуға және бірлескен білім беру жобаларын жүзеге асыруға өзара мүдделілік танытты.