Студенттер «Хулиганка» фильмін көрді

Қазақ-Америка университетінде «Хулиганка» қысқаметражды фильмінің көрсетілімі өтті. Іс-шараға ҚР Ішкі істер министрлігі Академиясының өкілдері мен мамандары қатысып, ол студент жастардың құқықтық мәдениеті мен әлеуметтік жауапкершілігін арттыруға бағытталды.

«Хулиганка» фильмі қиын өмірлік жағдайға тап болып, қылмыс жасаған жасөспірімнің тағдырын баяндайды. Фильм агрессия, құрдастар тарапынан қысым және өзін дәлелдеуге деген ұмтылыс деструктивті мінез-құлықтың қалыптасуына қалай әсер ететінін көрсетіп, жақын адамдар тарапынан уақтылы қолдаудың маңыздылығын айқындайды.

Көрсетілімнен кейін KAU студенттері фильмде көтерілген өзекті мәселелерді талқылады. Қонақтар жасөспірімдердің заңға қайшы әрекеттерге қалай тартылатыны туралы айтып, жастар арасында құқықтық сауаттылықтың маңыздылығын атап өтті. Қатысушылар мұндай форматтағы кездесулер ойланбай жасалған әрекеттердің салдарын түсінуге және өз іс-әрекеттеріне саналы көзқарас қалыптастыруға мүмкіндік беретінін жеткізді.

Университет психологы Гульжанар Калауова агрессияның артында көбінесе ішкі күйзеліс пен стресстік жағдайлар жататынын атап өтті және оларды еңсеруге болатынын түсіндірді. Ол студенттерді қажет болған жағдайда психологиялық қолдау қызметіне жүгінуге және өздерінің менталдық денсаулығына бейжай қарамауға шақырды.