Швейцария университетімен жаңа мүмкіндіктер

Қазақ-Америка университетінде Швейцарияның Женева қаласындағы Бизнес және менеджмент мектебінің (SSBM Geneva) өкілдерімен онлайн-кездесу өтті. Кездесуге шетелдік жоғары оқу орнының деканы Миа Симкокс пен академиялық бағдарламалар жетекшісі Олеся Мескина, сондай-ақ KAU президенті Асылбек Исахов, вице-президент Даурен Дюсебаев және халықаралық ынтымақтастық департаментінің директоры Арайлым Нурмашева қатысты.

Келіссөздер барысында тараптар ынтымақтастықтың негізгі бағыттарын талқылады. Соның бірі – Женевада қарқынды курстар мен «иммерсия апталарын» іске қосу. Бұл KAU студенттері үшін белгілі бір кезеңге халықаралық білім беру және бизнес ортасына еніп, жаһандық компаниялар мен ұйымдардың штаб-пәтерлеріне баруға, сондай-ақ еуропалық үлгідегі сертификаттар алуға мүмкіндік береді.

Ғылыми ынтымақтастықты кеңейту мәселесіне ерекше назар аударылды. Тұрақты даму және менеджменттегі заманауи технологиялар саласында бірлескен зерттеулер жүргізу үшін күш біріктіру жоспарлануда.

Кездесу аясында SSBM Geneva өкілдері KAU оқу процесіне енгізу үшін қарастырылып жатқан бірқатар инновациялық білім беру модульдерін таныстырды. Олардың қатарында БҰҰ өкілдіктерінде тәжірибеден өтуді қамтитын халықаралық қатынастардағы көшбасшылықты дамыту бағдарламалары, сондай-ақ жасанды интеллект пен экотехнологиялар саласындағы курстар бар.

Келіссөздер қорытындысы бойынша тараптар алдағы уақытта ынтымақтастық туралы меморандумға қол қою арқылы серіктестікті одан әрі нығайтуға дайын екендіктерін растады.