KAU-дағы халықаралық жазғы мектеп: екінші және үшінші күннің жарқын сәттері

KAU-дағы «Болашақ дипломатиясы: цифрлық дәуірдегі халықаралық қатынастар» халықаралық жазғы мектебінің бағдарламасы жалғасуда. Бағдарламаның келесі екі күні мазмұнды кездесулерге, академиялық дәрістерге және мәдени-танымдық іс-шараларға толы болды.

Екінші күн KAU оқытушыларының бағдарламаның негізгі тақырыптары бойынша дәрісімен басталды. Кейін қатысушылар Алматыдағы БҰҰ өкілдігіне барып, маңызды халықаралық құрылымдардың бірінің қызметімен тікелей танысуға мүмкіндік алды.

Күннің екінші жартысында қазақстандық дипломат, лингвист және жазушы Гулистан Хамзаева дәріс оқыды. Оның баяндамасы «Қазақтың шай ішу дәстүрі» тақырыбына арналды. Бұл қазақ халқының мәдени кодының ажырамас бөлігі, қонақжайлық дәстүрін, сыйластық әдебін және көпғасырлық тарихты біріктіретін ерекше мәдени құндылық. Күн соңында қатысушылар Әбілхан Қастеев атындағы Мемлекеттік өнер музейіне барып, қазақ және әлемдік бейнелеу өнерінің мұрасымен танысты. Бұл музей Орталық Азиядағы ең ірі өнер музейлерінің бірі саналады.

Үшінші күн тереңдетілген академиялық жұмысқа арналды. KAU оқытушыларының екі лекциялық блогы дипломатия және халықаралық қатынастардың өзекті мәселелерін қамтыды. Түстен кейін қатысушылар қала бойынша шолу экскурсиясына шықты. Ықылас Дүкенұлы атындағы музыкалық аспаптар музейі, Көк базар, «Рахат» фирмалық дүкені және 28 гвардияшы-панфиловшылар атындағы саябақ қонақтарға Алматының тарихы мен күнделікті өмірімен жақынырақ танысуға мүмкіндік берді.

Халықаралық жазғы мектеп жалғасуда. Алда қатысушыларды жаңа дәрістер, сарапшылармен кездесулер және қаламен танысу бағдарламасы күтіп тұр.