KAU мен Jiangsu Normal University Kewen College ынтымақтастық туралы меморандумға қол қойды

2026 жылғы 22 қыркүйекте Қазақ-Америка университеті (KAU) Қытай Халық Республикасындағы Jiangsu Normal University Kewen College делегациясын қабылдады. Кездесу барысында екі жоғары оқу орны арасындағы ынтымақтастықты дамытуға бағытталған Өзара түсіністік туралы меморандумға және Академиялық ұтқырлық туралы келісімге қол қойылды.

Құжаттарға KAU Президенті Асылбек Исахов және Jiangsu Normal University Kewen College партия комитетінің хатшысы Лю Сяолянь (Liu Xiaolian) қол қойды.

Қол жеткізілген келісімдер студенттер мен оқытушылардың академиялық ұтқырлығын дамытуға, бірлескен білім беру және ғылыми жобаларды жүзеге асыруға, зерттеу саласындағы ынтымақтастықты кеңейтуге, сондай-ақ оқыту тәжірибесімен алмасуға мүмкіндік береді.

Кездесу барысында студенттер үшін халықаралық мүмкіндіктерді кеңейтуге ерекше назар аударылды. Академиялық ұтқырлық туралы келісім екі университет студенттерінің алмасу бағдарламаларына қатысып, Қазақстан мен Қытайда академиялық және мәдениетаралық тәжірибе жинақтауына негіз қалыптастырады.

Сонымен қатар, KAU және Jiangsu Normal University Kewen College өкілдері алдағы ынтымақтастықтың басым бағыттарын және бірлескен жобаларды жүзеге асыру мүмкіндіктерін талқылады. Тараптар серіктестікті жүйелі түрде дамытуға және университеттер арасындағы академиялық байланысты нығайтуға қызығушылық білдірді.

Аталған құжаттарға қол қою KAU-дың халықаралық ынтымақтастықты дамыту және студенттер мен оқытушылар үшін жаңа мүмкіндіктер қалыптастыру бағытындағы кезекті маңызды қадамы болды. Университет академиялық алмасуға, бірлескен білім беру бастамаларына және халықаралық білім беру кеңістігіне интеграциялануға бағытталған шетелдік серіктестер желісін одан әрі кеңейтуді жалғастыруда.